بحلم

بحلم

بحلم بتلات أحلام وممكن يزيدوا مع الايام

بحلم مدينتي تبقى مليانه شجر في كل طريق وفي كل شارع
أكون مجموعة شباب وبنات ونعمل مشروعنا ونسميه "تشجير المدن"
مش هنطلب مساعدة من حكومة ولا من مجلس محلي هنعمل كل حاجه بمعرفتنا وبمجهودنا
وبعد ما ينجح نكمل في باقي المدن والأحياء اللي محتاجه اهتمام

وبحلم تاني بنفس فريقي اللي فوق ننزل مدارس ثانوي وإعدادي
الشباب يكلمو الأولاد ويصاحبوهم وينزلو معاهم في الشغل ويلعبو معاهم كورة
والبنات مع البناويت تعاملهم برقة كأنهم أخواتهم نعلمهم الشغل اليدوي ونخرج معاهم ونتفسح
نعلمهم يعني إيه حياء وإنهم غالين أوي في الإسلام ولازم يحافظوا على نفسهم
وفي الأخر حتى لو خرجنا بأتنين منهم مقتنعين بكلامنا يبقى أكيد إحنا نجحنا والمرة الجاية هيبقى اكتر

أما التالت بحلم بأول مرتب هاخده بعد التخرج
لأني بحب جدا الفلوس اللي بتكون نتيجة تعبي ومجهودي
هعمل أول حاجه جزء ثابت منه ذكاه عن مالي
وتاني حاجه على طول هشتري لماما حاجات كتير



إن شاء الله أحولهم لحقيقة .. فصبر جميل والله المستعان

بلونات الصابون

السلام عليكم

امبارح جتلنا خروجه من عند ربنا بليل صدر فرمان اننا هنروح حديقة الحيوان

عشان المتشردين "اقصد الاطفال" يتفسحو شوية قبل المدارس ما تبدأ

وطبعاً كانو وجوه مختلفة خالص عن اللي كانو في البوست اللي فات

معادا مصطفى ومروان هما اللي كلاكيت تاني مرة -هما معانا اساساً في اي حته ما علينا-الاهم

روحنا وهناك كان منتظرنا خلاتي الاتنين وازواجهم وولدهم طبعاً

كان يوم جميل جدا ضحكنا واتمشينا ولعبنا واتفرجنا على الحيوانات

اكتشفت من اليوم ده اني بقيت اقل عصبية على الاطفال او بمعنى اصح اني بقيت اتكيف معاهم

لان الاول كنت مش بحب امشي معاهم كتير وما زلت برضه مغيرتش فكرتي ولو في خروجه زي ديه بمشي لوحدي لاني اصلا بحب امشي لوحدي كتير

بس بعد الخروجه ديه واللي قبلها بقيت احب اخليهم يفرحو اكتر ويلعبو

بقرأ افكارهم واشوف هما عايزين ايه في اللحظة ديه واحاول اعمله ليهم

لاني اكتشفت ان جواهم طاقة كبيره جدا وعايزين يخرجوها ولازم تخرج في اللعب والخروج

مينفعش اني اقعد اضيق عليهم وازعقلهم كل شوية وانهم يمشو بأدب

عرفت انهم عاملين زي اللي نازل من على منحدر جامد اوي وبيجرو من فوقيه

ولو حد ضيق عليهم هيبقى عامل زي الصخرة اللي هتقف في طريقهم

وهتكون النتيجة هى التصادم واللي بيظهر في صورة العند مع الشخص ده ايان كان هو مين

طبعاً الجنينة كانت هناك زحمة جدا واحنا معانا ما شاء الله حضانة :D

وكل واحد خايف على الاولاد اللي معاه

قعدت اقول لماما سبيهم يرجو واحنا شايفنهم قدام عنينا اهو

مش لازم يمشو من نفس الطريق اللي اانتي هتمشي منه خليه يفكر بطريقته ويتصرف بناء على تفكيره

وانتي شايفاه قدام عنيك مش هيبعد بس متخليهوش كل شوية يحس ان في رقيب عليه وان في حد بيتابعه ويقوله لأ

امشي من هنا واتعالي من هنا

الاهم اني كنت فرحانه اوي وانا مخلياهم يعملو اللي عايزينه وبراحتهم

نسيت اقول سبب العنوان :d

انتو عارفين اللعبة اللي بتطلع فقعات صابون كدا كتير وبتتلون بالوان الطيف

كانت في اغنية عبد الحليم ومرفت امين مش فاكره اسمها

الاهم اني نويت اشتري واحده ليا لوحدي "محدش يضحك"انا بقول اهو

وفعلاً لما خرجنا اشتريت واحده لاني كنت بسرقها من مصطفى زمان والعب بيها

متتخيلوش هي جميلة قد ايه ومفيدة كمان ..لو غضبان مثلاُ بدل ما احرق اعصابي في حاجه او ازعق

اقعد انفخ فيها شوية جميله والله بس جربوها

واحنا مروحين في الميني باص طلعتا ونفخت بيها على العيال ورا

وشايفه ماما لسان حالها يقول يا خبتي في بينتي الوحيده اللي طلعت بيها من الدنيا

وخالتي او امي التانية زي ما بتحب قتولي دايماً بتقولهم يلا يا عيال خدو العيلة الجديدة معاكم تقعد ورا

وبتشاور عليا وقالتلي ربنا يكملك بعقلك

معرفش كانو مستغربين من ايه بصراحة يعني

ضحكاية من القلب

يتمناها الكثير .... ويبحث عنها الملايين

لكني وجدتها في وجوه هؤلاء

منه>>> أيمان
عندها سنتين وكام شهر كدا احلي ابتسامة بشوفها في على وشها
وبالذات لما تكون مكسوفة وأنا ببصلها وبضحك
منه فرحت أوي أول لما شافت البحر في أسكندرية ولما شافت المية وهي بتجري قدامها وأخواتها بيلعبو
وفرحت اكتر لما مماتها خدتها على الشاطىء من بره ووقفت معاها
والمية جت على رجلها والرمل بياخدها ويمشي لتحت وهي تمسك جامد في ايد ممتها
فرحتها كانت برئية اوي خلتها تطلع ضحكه من القلب


ميرو >>> مروان
سنتين ونص برضه اكبر من منه بشهرين بس كان مع بباه وممته بيتمشو على الكورنيش
واول ما جه وشافنا واحنا على البحر مرضيش يكمل معاهم وقعد معانا
بيخاف جداً من الميه هنا في البيت بس على البحر كانت فرحته متتوصفش
كان واقف بيعلب وفرحته باينه في عنيه قبل ما تترسم على شفايفه لان قلبه صافي
ميعرفش الكذب او الغش عشان كدا كانت اشارات قلبه اسرع لعنيه
شاف الموجه بتيجي واللي واقف يدخل فيها بس هو كان بيعمل حاجه مختلفه
اول لما الموجه تيجي يستعد عشان ينط وعقبال ما يخلص استعداد تكون هي مشيت
والمشكلة اننا على الرمله مش الميه من جواه فكان هو بينط في الرمله الحمد لله

منه وميرو كانو معايا قعدنا نلعب في الميه مع بعض ونعمل دايره ونمسك في ايدين بعضنا عشان ندور لما الموجه تيجي
وهو كان يقولها يلا يا منه هاتي ايديك نلعب بس هي هاديه ومش بتتكلم كتير تكتفي انها تبتسم بس


طاطا >>> مصطفى
اخو مروان اربع سنين وكان برضه مش معانا في الاول ولما رجع وشافنا ساب ممته وجري علينا
وقعد يتحايل عليهم يسيبوه في المية وعشان خاطري يا بابا مش عايز اتمشي
انا هقعد هنا .... وعلى نفس القصيدة وجميع المغريات بباه بيقدمها عشان يمشي معاهم بس على مين
البحر يكسب طبعاً
ممتي هي اللي كانت ماسكه مصطفي وكل لما العيال الباقيه تدخل جامد في المية تزعقلهم وتستخدم اسلوب التهديد
هنمشيييييييييي من الميه الكل يرجع لقواعده طبعاً وكله يتأدب
بس مصطفي كان بيخاف انها تنفذ التهديد ده بجد ويقولها نقعد شويه ومش نمشي دلوقتي
ويقعد يزعق في اللي دخل الميه وهيخليهم يمشو من متعة الموجه وهي جايه عليهم
في الاخر خاف جداً وهو اللي طلب يمشي منها :d


أحمد >>> مش ليه اسم دلع
في تالته ابتدائي ... واخو منه مش بحب اقول على طفل انه شقي او شيطان وما الي ذلك
بس فعلاً لو دورت على حاجه اوصف بيها احمد مش هلاقي ادق من التعبيرات ديه
عندي جداًً وبيحب يعمل اللي في مزاجه واي حاجه تبسطه او هو عايزاها بيعملها على طول
من غير استأذان ودايما يتصرف من دماغه
كان قاعد جمبي على الصخرة قبل ما أي حد يجي منهم عدتيها وقولته كذا مرة قوم اقعد ورا شوية بس مش بيسمع الكلام
قولته خلاص هتقعد تقعد من غير نفس يخرج منك ولا تتكلم نص كلمة
ولو سمعت صوتك بس هترجع البيت

:d ....وكان كل ما يتكلم اعمله حركة بايدي فيما معنا يا تسكت يا هترجع
ده تقريباً زعيم الحركة ان الكل ينزل المية كدا لانه اول واحد نزل منهم
احم ..... بعد انا طبعاً ما شوفت الموجه جايه ونزلت من على الصخرة للرمله راح هو نزل ورايا وبعدها للقيت الهجوم من الباقي
احمد شاف البحر مالح اوي فراح يسأل ممته

هما حاطين كام كيس ملح في البحر عشان يبقى مالح اوي كدا ؟؟


لودي >>> خالد
رايح رابعه ابتدائي .... مش بعتبره طفل لانه مش عايش حياة الاطفال
بحس دايما انه كبير بس مش حاجه حلوه فيه ومش بحبها لانه بيدخل في حاجات ملهوش علاقه بيها
مكنش معانا في الجزء الاول من المهرجان ده :d بس جه في الجزء التاني هو وممته واخته وكنت انا بس اللي لسه موجوده على الشط ساعتها والباقي روح الشقة
صمم انه هيقعد يتفرج على البحر في الوقت ده ... حاولنا نعمل حركة انه يروح الشقة وبعدها هنبقى نخرجه تاني بس هو عارف الحركات ديه ومرضيش خالص يمشي من مكانه
كانت نظرته للبحر جميله اوي بيتأمل فيه وفي نفس الوقت خايف اننا نقوله يلا نمشي
بس اكيد كان مستمتع بيها


زوبه >>> زينب
رابعه ابتدائي برضه واخت احمد وايمان ... بحبها اوي البنت ديه لان تصرفاتها تلقائيه لابعد الحدود
وخدومه جدااااااااا ومش بتزعل من حد ولا بتشيل في قلبها حاجه خالص
ولو زعلت ممكن بأقل شىء تفرح تاني وتضحك ولا كأن في حاجه
ممكن ازعق لمماتها لو ضربتها او زعقتلها حتى لو زينب غلطانه بس مش بحبها تزعل
واحنا على الشط زعقلتها برضه عشان عملت حاجه... وجت وقفت جمب الصخرة اللي كنت قاعده عليها
شاورتلها انها تيجي تقرب مني .... قالتي بس اسكتي بقه انا زعلانه
وشوية لقيتها جايه لوحدها بتقولي عايزه ايه .... انا فهمت انها جايه عشان اقولها متزعليش
بوستها وقولتلها متزعليش ويلا روحي العبي مع اخواتك وماما بتهزر معاكي
ثانية والله ولقيتها بتضحك وفرحااااااااانه اوي وقالتلي انا هروح العب معاهم بقه
ونسيت كل حاجه وراحت وقفت مع ممتها تاني ومسكت في ايدها


ميود >>> ماجد
سادس ابتدائي .... بيحب يطالب بحقه اوي بس بأدب وديه اكتر حاجه بتعجبني فيه
كان هو واحمد السبب في ان ماما تقول دايما هنروح لو مش قعدتو ساكتين لانهم كانو بيدخلو مع الموج
والساعه كانت 2 بليل وكل شوية مصطفي يقولهم ارجعو متخلوش عمتو تزعل ونمشي
فرحة ميود كانت لما يشوف الموجه ويقعد على الرمله وهي تغطيه من اوله لآخره وهو يصررررررررخ منها
مبسوط مش خايف يعني
ولما حد يضيق عليه ويقوله كفاية كدا اقعد شوية او يزعق ... يقولهم احنا جايين نتفسح ليه بتزعقوا
وانتو جايين هنا عشانا احنا ولازم نتبسط
في الاخر لما جم يمشو وانا هقعد اكمل اتنطط وازاي هي تقعد لوحدها..... وليه مش تمشي معانا .... واشمعنى
وكان هيعيط عشان هيمش وانا لأ ... بس مشي في الاخر


شيمو>>> شيماء
اولي اعدادي ... معاها لغات انجليزي وفرنساوي ما شاء الله ... اه نسيت اقول ان ميود كمان معاه اللغات ديه
لانهم في مدرسة خاصة عقبال اولادكم... اخوات برضه
شيماء ديه كانت عسل عسل بجد يعني جت في الجزء التاني من مهرجان الاطفال مع خالد وقعدو هما الاتنين يلعبو مع بعضهم ويرشو على بعض الميه
برضه صممت زي خالد انها هتقعد معانا اول لما جم وكانت هتعيط عشان هيمشوها وفرحت اوي لما قعدت تلعب
هي كلها اتغرقت ميه بس يجي عند وشها ولا يمكن الميه تفضل عليه
تروح وتيجي تقولي امسحي وشي ... يا بنتي مش معايا منديل دلوقتي تقولي امسحي في الخمار :d


كل دول متتخيلوش هما نامو ازاي لانهم تعبو اوي عشان لعبو وخرجو الطاقة من جواهم كان شكلهم حلو جدااا وهما نايمين زي ما يكونو ملاك بالظبط

كنت بدقق في عيون كل واحد وواحده منهم وكنت بشوف الفرحة وهي بتنط منها وانا كمان فرحت جدا من قلبي عشان هما فرحانين لان ضحكتهم جميله اوي تخلي أي حد يرمي همومه على اقرب صخرة ويضحك معاهم

ودعت منهم اتنين ميود وشيماء لان الاجازة خلصت ورجعو بلدهم بس تبقت ليا ذكرى ابتسامة الساعات القليله ديه